Red Collado nanawagan sa mga LGUs sa Bukidnon alang sa Prevention and Control sa ASF

42
Nanawagan si Regional Executive Director Carlene C. Collado sa Department of Agriculture (DA)-10 sa nagkadaiyang lokal nga kagamhanan sa probinsya sa Bukidnon, agi ug paghatag importansya sa pagsunod ug pagpatuman sa Prevention and Control sa African Swine Fever (ASF), subay sa gipalugwa nga Executive Order No. 35, series of 2020 sa Local Chief Executive sa lalawigan, lakip na dinhi ang Joint Memorandum Order No. 01, series of 2022 sa Department of Agriculture ug Department of the Interior and Local Government (DILG).

Gidasig ni RED Collado ang mga City/Municipal Agriculturists atol sa pakigpolong niini sa gipahigayon nga ASF Information Caravan Bukidnon, niadtong Abril 8, 2022 nga mamahimo nilang lig-on nga basehan ang nanganlang mga mandu, arong hingpit maprotektahan ang lalawigan sa Bukidnon batok sa hulga nga dala sa ASF.

Nagpadayon usab ang pagtimbayayong sa Department of Agriculture sa Provincial Local Government sa Bukidnon, uban sa hog raisers, veterinary groups, ug sa pribadong sektor alang sa estrikto ug malahutayon nga pagpatuman sa biosecurity measures ubos sa “Bantay ASF sa Barangay” nga programa.

Alayon niini, gipahimangnuan ug gipahinumduman ni RED Collado ang publiko nga ang deklarasyon kung infected ang usa ka syudad o probinsya sa ASF, maggikan lamang kaniya o sa Department of Agriculture Region 10 ug walay lain nga gitahasan nga magdeklara niini, rason nga dili angayang magsabwag sa impormasyon kung walay igong basehan.

Nasayran nga ang Bukidnon usa sa mga gikuhaan sa tinubdan sa supply sa karneng baboy pangadto sa Luzon ug ubang bahin sa Visayas, subay sa programa sa Department of Agriculture nga suportahan ang ubang probinsya nga ma-supplayan sa karneng baboy, ubos sa pagsiguro nga dili usab kulangon ang supply niini sa Bukidnon.

Facebook Comments