San Pedro PNP diskumpyado sa pahayag sa rider nga gitulis

Davao City – Adunay mga nakitang inconsistency ang San Pedro Police Station ngadto sa foodpanda rider kinsa alegasyong gi-hold up ug gitionan og pusil niadtong Sabado sa kadlawon Agosto 13, 2022 sa Phase 5, El Rio Subdivision, Brgy. 19-B, Davao City.

Sa interbyu sa DXDC RMN Davao kang Police Major Romeo Mapanao Jr., Station Commander sa San Pedro Police Station, nagpadayon ang ilang imbestigasyon ug pagpanubay kung tinuod ba ang maong complaint sa rider.

Gibutyag ni Mapanao, nidangop ang maong rider sa kapulisan human giingong gidagit ang iyang halin nga P6,000 ug cellphone.

Segun ni Mapanao, usa sa mga nakita nilang ‘inconsistency’ sa statement sa rider sa ilang pagpanubay sa lugar mismong tagbalay ang nikumpirmang walay food delivery nga transaksyon atong mga orasa.

Nagpahimangno si Mapanao sa mga netizens nga mamahimong responsible sa pag-post sa social media ilabina kung wala pay kasigurohan ang usa ka reklamo aron dili ikaalarma sa publiko.

RadyoMaN Aimee Guinita

Facebook Comments