SANGGUNIANG PANGLUNGSOD SA DAPITAN GIKONDENA ANG GIHIMONG PAGDONAR SA MGA KABTANGAN SA PROBINSYA SA ZAMBOANGA DEL NORTE

9
Mayoriya sa mga myembro sa Sangguniang Panglungsod ang nikondena sa gihimong pagdonar sa mga nagkadaiyang kabtangan, kagamitan ug mga suplay nga mahinungdanon para magamit sa nagkalain-laing programa, pagtubag sa emerhensya, pag-andam sa katalagman ug pagpauswag sa mga proyektong imprastraktura sa probinsya. Mayo 23 ning tuig gipasupot sa Sangguniang Panlalawigan ang resolusyon sa pagdonar sa mga nagkadaiyang kabtangan, mga medikal nga ekipo sa Zamboanga del Norte Medical Center ug pipila ka mga sakyanan sa probinsya. Sumala sa Official Poverty Statistics of the Philippines, First Semester 2021 sa Philippine Statistics Authority, nahilakip gihapon ang probinsya sa Zamboanga del Norte sa usa sa pinakapobre nga probinsya sa nasud. Ug ang pagdonar sa mga importanteng kabtangan nga iya sa Pangagamhanang Probinsiyal mao’y hinungdan nga maglisod sa paghatag sa kapasidad para sa makahuluganon nga pagserbisyo labi na sa imprastraktura. Busa nanawagan karon ang Sangguniang Panglungsod sa Dapitan sa Sangguniang Panlalawigan sa Zamboanga del Norte nga ipatuman ang maayong paghukom ug ipataas ang interes sa mga katawhan sa tibuok probinsya og i-revoke niini ang gipasar nga resolusyon ug i-deny niini ang tanang hangyo gikan sa mga nagkadaiyang LGU nga naghatag otoridad kay outgoing Governor Roberto Uy nga ipatuman ang katapusang minuto nga mga donasyon. Niadtong Mayo 25 hiusa ang siyam ka mga konsehal nga sila Konsehal Divine Patilano, Konsehal Amalou Monroyo, Konsehal Ronie Jarapan, Konsehal Jezebel Balisado, Konsehal Angelica Carreon, Konsehal Adora Recamara, Konsehal Alexander Estacio, Konsehal Felix Tacbaya-PFABC ug Konsehal Mary Ann Rendon-PFSK sa pagkondena sa gipasupot nga resolusyon sa Sangguniang Panlalawigan mentras mipakita sa ilang pagsupak sa gihimong pagkondena si Konsehal Gabriel Cad apan si Vice Mayor Israel Patrick Chan walay nahimo kondili mipamatuod na lamang sa siyam ka mga miyembro nga mipakanaog ug motion sa pagkondena sa mao nga lakang ni Outgoing Governor Roberto Uy.
Facebook Comments