Arestado kagahapon sa hapon ang duha ka misis, duha ka mga vendors, duha ka mga driver ug usa ka mag-uuma sa gihimong buybust operation sa Barangay Marawi, Marawi City.
Giila ni Police Major Cris Cabugwang, hepe sa Lanao del Sur Provincial Drug Enforcement Unit (PDEU), ang mga suspek nga sila si Asmina Paudac, 27 anyos ug Olaw Disimban, 42 anyos, pulos mga plain housewife; Jaffar Ali, ug Maco Murun,pulos mga 35 anyos ug driver sa pampublikong sakyanan; Arafat Dalomabao, 41 anyos ug Salima Mimbalawag, 40 anyos, mga vendors; ug ang mag-uumang si Jalaloden Macapando, 26 anyos.
Pulos mga residente sa Lanao del Sur ang mga suspek ug mga iladong mga drug pusher base sa imebstigasyon sa kapulisan matud pa ni Cabugwang.
Tunga sa kilo nga gituohang shabu, nga adunay gibana-banang market value nga 1.9 million pesos ug usa ka one thousand-peso bill nga gibutang sa ibabaw sa peke nga kwarta nga maoy gigamit nga buy bust money nga mokantidad og usa ka milyon ka pesos ang nakuha gikan sa mga suspek.
Nakuha usab sa mga utoridad gikan sa usa kanila ang cellular phone nga gituohnag gigamit sa mga transaksiyon sa ilang mga ilegal nga negosyo.
Ang mga suspek ug ang mga ebidensiya gi-turn over na ngadto sa Marawi City Police Station alang sa pagproseso sa kaso batok sa pito.
