Giila ang biktima nga si Haime L. Sibayan, 28 anyos, ulitawo, ug residente sa Purok-10, Natid-asan, Barangay Casisang, Malaybalay City, Bukidnon nga nagmaneho sa usa Honda Wave nga single motor, nga gipanag-iyahan ni Ronmark Camarino Sigocan sa Purok-9, Sitio Kamanta, Lirongan, Talakag, Bukidnon.
Samtang ang nabanggaan niini nga Isuzu Elf, narehistro ngadto kang Michelle M. Cordes, sa Balingasag, Misamis Oriental ug gimaneho ni Robert Jayson Trazoma, hingkod ang pangidaron, ulitawo, ug residente sa Purok-5, Barangay Casisang, Malaybalay City, Bukidnon.
Sumala sa report sa kapulisan, nga nakaparada lang sumala pa ang maong Elf kilid sa dalan, apan nabangga kini sa maong single motor nga gadagan gikan sa kasadpan nga bahin padulong sa silangang direksyon. Una matud pa nga gibanggaan sa maong single motor ang barikada nga kahoy pila ka metros gikan sa maong elf ayha midasuk ngadto sa luyo nga bahin niini.
Gumikan sa maong panghitabo, nakaangkon og grabeng injury sa kalawasan ang biktima nga gisuwayan pa og dala sa balay-tambalanan apan gideklarang dead-on-arrival sa doctor.
Temporaryo usab nga gidala sa presinto sa kapulisan sa Malaybalay ang drayber sa maong Elf lakip ang gimanehuan niini alang sa tokmang disposasyon.
