Nagpahulay karon ang usa ka tinun-an sa balay tambalanan human napusilan sa security guard sa Ubay National High School didto sa Labason, ning atong probinsya sa Zamboanga del norte.
Sa maong panghitabo dali nga miresponde ang kapulisan sa lungsod sa Labason aron sutaon ang panghitabo. Naila ang suspek nga si Teodoro Mi-ot y Lagudas, 60 anyos, menyo, sekyu sa maong tulunghaan.
Sa gihimong imbistigasyon sa kapulisan, tulo (3) ka studyante sa Ubay Nat’l High School ang lango kini sa ilimnong makahubog ug namugos matod pa sa sekyu nga mosulod apan gi bawalan kini ilabi na nga hugtanon kining guidili sa tulunghaan.
Pero wala kini sila naminaw ug gitulod na hinuon ang gate aron nga makasulod, matod pa nga ge atake usab sa maong studyante ang sekyu aron makig-away. Hinungdan nga milanit sa 357 nga pistola ang sekyu aron iyang hatagan ug warning shot, aksidente usab nga naigo ang wala nga tiil ang studyante nga si Ian Bahian y Taruc, 18 anyos, Grade 8 student, residente sa brgy. Ubay, Labason.
Sa pagkakaron gi turn over na sa kapulisan ang armas samtang gibalhog na sa balay bilangguan ang sekyu alang sa tukmang disposasyon.
