Sa pakighinabi sa DXDC RMN Davao sa pipila ka mga residente sa Calinan, ilang gisulti nga ang mga panghitabo sa ilang dapit, nakaalarma na nila ug naapektuhan na sab ang ilang adlaw-adlaw nga kinabuhi tungod sa maong mga insidente.
“Alarming gyud kaayo labi na sa kay isa ra mi ka district. Sauna wala may mga panghitabo nga ing-ani sa among lugar. Makabati og kahadlok ug kaguol ang mga ing-ani na panghitabo, maong angay gyud mi mag-igmat ug dungag na pag-amping labi na kung gabii. Kung wala nay importanteng lakaw, mag puyo nalang jud sa balay labi na sa mga babae aron mapalayo sa samang mga panghitabo,” matud pa ni Giovanni Salang nga taga Calinan Poblacion.
Dugang pa sa usa ka Charice Canedalla, 27 anyos nga taga Subasta Calinan, nga angay hatagan na og aksyon sa taas nga nagdumala kay para maminusan na ang insidente, basin madugangan pa ang mga nabiktima sa krimen.
Kahinumduman nga niini lamang tuiga, wala’y undang ang mga trahedya sa Calinan nga gikakurat ug gikasubo sa publiko sama sa mga aksidente sa kalsada, pagbusikad sa bomba, shooting and hacking incident diin duha ka pulis ang patay human miresponde sa kagubot sa may Brgy. Lacson, Calinan, ug ang Bragas rape-slay, nga puros nikutlo og mga kinabuhi.
Nanghinaut karon ang katawhan nga mas tutukan pa sa otoridad ang seguridad sa tibuok dakbayan.
RadyoMaN Ivy Parido
