Telcos angay imbestigahan

29

Davao City – Natahap karon ang Kapisanan ng mga Brodkasters ng Pilipinas (KBP) Davao City Chapter sa nahimong rason sa usaka telecommunications company sa nasud sa kalit pagwagtang sa ilang serbisyo kagahapon adlawa dinhi sa Mindanao.

Nanawagan karon si KBP Davao Chapter President Roy Geonzon sa National Telecommunication Commission (NTC-XI) nga imbestigahan ang matuod nga hinungdan sa pagkaguba sa serbisyo aron masuta kon tinuod ba o dili ang rason sa giant telco.

Sa telco advisory nga gipagula kagahapon, naputol matud pa ang usaka portion sa optic fiber niini maong nawala ang internet ug voice services sa ilang mga customers sa pipila ka mga lugar sa Mindanao.

Segun ni Geonzon, pildi kanunay ang publiko sa ing-ani nga kahimtang kay bisan tuod og nawala sa usa ka adlaw ang serbisyo sa telco apan ang mga customers tibuok buwan gihapon ang bayran.

Gihingusgan ni Geonzon nga kon mawala ang serbisyo sa mga telcos, dili angay pabayaron ang publiko inay mas angay pa gani ulian og bayad sama sa rebates or refund ang ilang mga subscribers ug customers.

Tungod sa kawalay abiso sa service interruption, daghang mga industriya, serbisyo sa mga buhatan sa gobyerno ug kalihukan sa publiko ang naapektohan kagahapong adlawa.

Nagpasidaan usab si Geonzon ngadto sa mga telcos sa deadline nga gihatag sa gobyerno kanila aron ayuhon ang ilang serbisyo aron dili sila mabakwian og prangkisa sa dili pa matapos ang December 2020.




RadyoMan Joel Viray

Facebook Comments