Davao City – Kapin P130,000 ang girekomenda nga piyansa alang sa temporaryong kagawasan sa tulo ka mga wanted person human nasikop ug nasilbe ang ilang warrant of arrest sa nagkadaiyang kaso human gikasa ug gipatuman ang Anti-Criminality Terrorism Clearing Operation sa kapulisan.
Unang nasikop si Norcaya Camayug, 26 anyos, negosyante, nagpuyo sa Brgy. 8-A ning siyudad, dunay kasong unlawful arrest nga dunay piyansa nga P3,000 nga gipirmahan ni Presiding Judge Nannette Limana sa MTCC sa Branch 6.
Ikaduhang nasilbihan sa iyang warrant of arrest sa kasong attempted murder ang usa ka Joseph Latawan, 23 anyos, helper, residente sa Purok San Rafael Brgy. 10-A ning dakbayan, dunay piyansa nga mukantidad og P120,000 nga gipatuman ni Presiding Judge Edilu Hayag sa Regional Trial Court Branch 53.
Ikatulong nasikop ang usa ka engineer nga si Necasio Chavez, 85 anyos, nagpuyo sa Riverview Village, Bacaca Brgy. 29-B dunay kasong kalapasan nga Falsification of Public Documents nga dunay P12,000 pyansa human gipirmahan ni Judge Maria Sophia Palma Gil-Torrejos sa MTCC Branch 4.
Ang tulo ka mga wanted balhog na sa selda ka kapolisan ug gihikay na sa otorida ang mga dokumento aron i-inquest ngadto sa korte.
RadyoMaN Don Pulayao
