Giila ang mga namatay nga silang Joseph Pateres Aguilar, alyas, Dodong Gonzaga Tatao, wanted person, kalive-in niini nga si Marissa Libringka Roceña, ug usa ka Jun Plaza, nga bisita sa maglive-in ug gikaingong taga Barangay Balokbokan, Kitaotao, Bukidnon.
Sumala sa taho sa kapulisan, nga sa dihang nanoktok sila sa balay sa maong wanted aron i-serve ang warrant of arrest, kalit silang gipabuthan sa kalibre 45 nga armas hinungdan sa pagka-igo sa usa ka pulis sa dughan ug sa abaga nga bahin niini.
Milungtad sa kapin kon kulang 20 minutos ang pagbinayloay sa bala sa duha ka kampo nga nakahatag usab kabalaka sa katawhan nga nanimuyo sa maong lugar.
Human ang maong operasyon, nagbuy-od ang tulo ka mga patayng lawas sulod sa panimalay samtang luwas ra usab ang kahimtang sa pulis nga napusilan atol sa maong insidente.
Gikatahong walay pay tuig nga nanimuyo ang maong maglive-in sa maong lugar nga nagtago sa laing pangalan.
Sa pikas nga bahin, luwas ra usab ang kahimtang sa wala pay tuig nga anak sa maong maglive-in ug posibleng iturn-over sa Department of Social Welfare and Development (DSWD).
Gidala na sa punerarya ang mga namatay sa maong insidente.
