19 ka mga kanhi miyembro sa npa, mitahan sa kasundaluan sa 4th ID duha ka semana sa pagsulod sa tuig 2023

Muabot sa 19 ka mga kanhi miyembro sa New People’s Army (NPA) ang mitahan sa kasundaluan sa 4th Infantry Division sa Philippine Army duha ka semana human ang paglusad sa maong hugpo sa kasundaluan sa kampanya batok sa teroristang grupo sa NPA karong tuig 2023.

Ang maong mga kanhi rebelde misurender sa hugpo sa 29th Infantry Battalion ug 36th Infantry Battalion ilawom sa operation control sa 901st Infantry Brigade nga nakabasi sa Las Nieves, Agusan Del Norte lakip usab sa 1st Special Forces Battalion ilawom sa operation control sa 403rd Infantry Brigade ning probinsya sa Bukidnon diin kinatibuk-ang 23 ka mga tag-as ug mugbo nga kalibre sa armas ang narekober.

Sa pamahayag ni 4ID Commander MGen. Wilbur C. Mamawag, gibutyag niya nga gipili sa mga kanhi rebelde ang manimuyo og balik sa malinawong pamuyo kauban ilang tagsa-tagsa ka mga pamilya.

Ginaproseso na sumala pa ang mga papeles sa mga mitahang kanhi miyembro sa NPA alang na usab nga makapahimulos sa programa sa gobyerno.

Gipanawagan usab niya ang mga nahibiling miyembro sa NPA nga mutahan na balik sa sabakan sa gobyerno ug mupuyo nga malinawon tungod kay dili sumala pa muundang ang kasundaluan sa paglakag kanila.

Facebook Comments