DTI-Bukidnon, gipasabot nga nihit ang supply sa sibuyas maong paspas ang pagsaka sa presyo niini

Gipasabot karon sa Department of Trade and Industry (DTI)-Bukidnon nga nihit ang supply sa sibuyas maong paspas ang pagsaka sa presyo niini.

Sa interview sa RMN Malaybalay ngadto kang Junar Merla, Chief sa Consumer Protection Division sa DTI-Bukidnon, gibutyag niya nga gikan sa P300-P400 nga kilo sa sibuyas, paspas kining misaka ngadto sa P700 hangtud P800 ang matag kilo.

Kini sumala pa sa rason nga nihit ang supply sa maong commodity sa kamerkadohan ug taas ang presyo niini gikan sa mga traders.

Gilauman matud pa ni Merla nga sa ginaprosesong import karon sa mga sibuyas Bombay gikan sa laing nasud, muubos na ang presyo niini pinaagi sa Department of Agriculture (DA).

Dili matud pa masiguro kung kanus-a kini mahimong epektibo tungod kay nagadepende kini sa pagproseso sa maong lakang sa nasud.

Muabot sa kapin 20 mil nga metric tons sa sibuyas ang ginaproseso karon nga i-import sa nasud diin gilauman nga hingpit nga muubos ngadto sa P100 hangtud sa P150 ang matag kilo sa sibuyas.

Facebook Comments