Isang 43-anyos na lalaki ang naaresto ng mga awtoridad sa Barangay Don Matias, Burgos, Pangasinan noong Hunyo 3, 2026, dakong alas-7:20 ng gabi, kaugnay ng kasong paglabag sa Violence Against Women and Their Children (VAWC) Act.
Kinilala ng pulisya ang suspek bilang isang may-asawa at backyard hog raiser na residente rin ng nasabing barangay. Isinagawa ang pag-aresto ng mga tauhan ng Burgos Police Station sa bisa ng Warrant of Arrest na inilabas ng Regional Trial Court, Branch 32, Agoo, La Union.
Ang kaso ay may kaugnayan sa paglabag sa Section 5(i) ng Republic Act No. 9262 o ang Anti-Violence Against Women and Their Children Act of 2004 sa ilalim ng Criminal Case No. FC A-2582 na may petsang Mayo 25, 2026.
Ayon sa warrant, itinakda ng hukuman ang piyansa para sa pansamantalang kalayaan ng akusado sa halagang P72,000.
Matapos ang pag-aresto, dinala ang suspek sa Burgos Police Station para sa kaukulang dokumentasyon at iba pang legal na proseso bago iharap sa korte.
Patuloy namang pinaaalalahanan ng pulisya ang publiko na sumunod sa batas at makipagtulungan sa mga awtoridad upang mapanatili ang kaayusan at mapangalagaan ang karapatan ng bawat mamamayan. 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
