Arestado ang isang 45-anyos na lalaki na kabilang sa mga wanted person matapos ipatupad ang warrant of arrest laban sa kaniya sa Barangay Tanaytay, Alaminos City, Pangasinan, noong Oktubre 19, 2026.
Isinagawa ang pag-aresto ng mga tauhan ng Alaminos City Police Station sa ilalim ng pangangasiwa ni PLTCOL Jan Ringgo R. Quintinita, Chief of Police, sa pakikipag-ugnayan sa Regional Intelligence Division ng Police Regional Office 1 (RID PRO1).
Nahaharap ang suspek sa kasong Acts of Lasciviousness sa ilalim ng Article 336 ng Revised Penal Code, na nakatala sa Criminal Case No. 11545.
Ang warrant of arrest ay inilabas noong Oktubre 13, 2026, ni Hon. Rhoda N. Odero, Presiding Judge ng Municipal Trial Court in Cities (MTCC) ng Alaminos City, Pangasinan. Nakatakda naman sa ₱36,000 ang inirekomendang piyansa para sa pansamantalang paglaya ng akusado.
Ayon sa ulat, isinagawa at idinokumento ang operasyon gamit ang Body-Worn Camera (BWC), alinsunod sa umiiral na mga patakaran at alituntunin ng Philippine National Police (PNP).
Patuloy naman ang Alaminos City Police Station sa pagtugis sa mga wanted person at pagpapatupad ng batas bilang bahagi ng pagsisikap na mapanatili ang kapayapaan at kaayusan sa komunidad.
Muling iginiit ng himpilan ng pulisya ang pangako nitong maghatid ng propesyonal, makatarungan, at may pananagutang serbisyo sa publiko. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
