Air quality sa Davao region, nagpabiling “Good to Fair” — DENR

Davao City – Nagpabilin sa lebel nga “good to fair” ang kalidad sa hangin sa Davao Region, sumala sa pinakabag-ong datos gikan sa Department of Environment and Natural Resources–Environmental Management Bureau Region XI (DENR–EMB XI).

Gilimod niini ang nagkatag nga mga pahayag sa social media nga nagaingon nga “unhealthy” na ang kahimtang sa hangin sa rehiyon.

Base sa monitoring sa ahensya, luwas gihapon sa kasamtangan ang lebel sa hangin alang sa publiko. Ang mga datos gikolekta gikan sa ilang monitoring stations sa Calinan National High School sa Davao City, Tagum National Trade School sa Tagum City, Davao del Norte, ug sa Malita Power Inc. sa Malita, Davao Occidental.

Padayon usab ang hugot nga pagmonitor sa air quality aron masiguro ang kahimsog sa katawhan ug maprotektahan ang kinaiyahan. Gitan-aw sa ahensya ang lebel sa particulate matter sama sa PM10 ug PM2.5, lakip ang sulfur dioxide (SO2), aron matimbang ang kahimtang sa hangin.

Mitumaw ang isyu human sa mga post sa social media nga nagaingon nga adunay haze sa Davao City nga posibleng makadaot sa panglawas, ilabi na sa sensitibong grupo. Apan klaro nga giingon sa mga otoridad nga walay basihan ang maong mga pahayag sumala sa kasamtangang monitoring data.

RadyoMaN Kareen Beltran