Davao city– Sikop sa search operation ang usa ka baguhan sa pagpayuhot og iligal nga droga sa area of responsibility sa Sasa PNP pasado 11:00 sa kaudtohon kagahapong adlawa.
Giposasan sa kapulisan si Jeanet Fiel Gonzales, hamtong ang pangidaron ug residente sa Barangay Aliongto, human nakarekober sa mga awtoridad ang unom ka sachet sa shabu nga mukantidad og 12 mil ka pesos ug mga paraphernalia sulod sa iyang panimalay.
Suma ni Sasa PNP Chief of Police Senior Inspector Noel Villahermosa, midawat siya og taho nga namaligya og shabu ang suspek busa gipahigayonan og test buy si Gonzales.
Dihang nakumpirma ang iligal nga kalihukan gilayon nag-aplikar og search warrant ang Sasa PNP sa korte dayon gilusad ang pagronda sa balay sa suspek diin nakumpiska ang unom ka sachet sa shabu.
Si Gonzales, gikunsidara nga bag-ong drug personality sa area of responsibility sa Sasa PNP nga nag-operate sa Barangay Aliongto ning syudad.
Kalapasan sa Republic Act 9165 kun Comprehensive Dangerous Drugs Act of 2002 ang gipasaka nga kaso sa piskalya batok sa dinakpan samtang temporaryo kini nakapaslak sa selda Sasa PNP.
Kasamang Joel Viray
