AI robots sa Davao, pwede maka-ila sa mga wanted persons

Davao City – Padayon karon nga gipakusgan sa lokal nga panggamhanan ang tinguha nga adunay mga AI robots nga ibutang sa mga buhatan ug public places aron makatabang sa pagpagaan sa kinabuhi sa matag Dabawenyo.

Sa pakighinabi sa mga tigbalita, gibutyag ni Councilor Bonz Andre Militar, chairperson sa Committee on Information Technology, nga padayon nga gihisgutan sa committee hearing ang balaodnon alang sa mga AI robots sa dakbayan aron sa pagpakusog sa public safety ug disaster response.

Matud ni Militar nga adunay unang tulo ka mga robots nga ibutang sa City Hall, Sangguniang Panlungsod, ug mga parks. Depende pa kini sa committee hearing ug legislation kon ma-implement ang AI robots sa Davao City.

Lakip, matud pa, sa mga katungdanan sa maong robot mao ang pag-ila sa mga wanted persons diin kini usab ang mag-report ngadto sa law enforcement agencies, ug ang pagresponde sa mga kalamidad, ilabina sa pagsayod sa presensya sa tawo kon adunay kalamidad.

RadyoMaN Bien Abanos