El barangay de Calarian ya compra Segundo mano firetruck para sirvi conel constituent encase tiene quema.
Na entrevista na DXRZ RMN Zamboanga con el Capitan del barangay si Elking Omaga, ya confirma le fondo del barangay ya alcansa P1.2 miliones de peso ya usa para compra con el surplus firetruck.
Asegun con Omaga gendeh ta palta cada año tiene ta sosede quema na diila barangay si porque ya tene le el initiativa para compra con el firetruck que puede ayuda con el bumbero encase man de quema.
El firetruck es un penetrator que puede entra na maga diutay camino que amo pirmi ta man problema el maga grande truck de bumbero cadavez tiene maga quema especialmente si el lugar tiene bien diutay calsada.
Asegun pa con Omaga 50 maga volunteer fire brigade el conquien ya man train el BFP quien puede responde junto con el diila firetruck si tiene quema.
Na 50 maga volunteer fire brigade, ta composite qui maga tanods, staff del barangay y otro maga vivientes el concierne na barangay.
