CHR-7 namahayag nga wa masunod ang minimum human rights standard sa gipahigayong greyhound operation sa PDEA-7 ngadto sa CPDRC

Nagpadayon pa ang gihimong imbestigasyon sa Commission on Human Rights (CHR)-7 labot sa nahitabong pagpahubo sa mga inmates sa Cebu Provincial Detention and Rehabilitation Center (CPDRC).

Kahinumduman nga nakaangkon og pagsaway sa social media ang gihimong pagpahubo sa mga inmates, atol sa gihimong greyhound operations sa Philippine Drug Enforcement Agency (PDEA)-7 diin lakip nga nipaabot ug kabalaka niini mao ang Amnesty International tungod kay giingong nakalapas kini sa tawhanong katungod sa mga piniriso.

Suma ni Atty. Arvin Ordon, Regional Director sa CHR-7, nga duna gyuy probisyon sa minimum human right standards ang wa masunod atol sa maong operasyon.

Nagkanayon si Ordon nga basi sa general rule sa United Nations (UN) Minimum Human Rights Standard alang sa mga piniriso, kinahanglan nga pasul-ubon ug sapot ang mga piniriso nga haom alang kanila.

Hinoon, sa kasamtangan dili pa makasulti ang opisyal kun duna ba gyuy nalapas sa tawhanong katungod sa mga piniriso, diin mo-sentro ang ilang imbestigasyon batok kang PDEA-7 director Yogi Ruiz isip siya maoy labaw sa ahesiya ug sa pag-ila sa ilang personnel nga ni-circulate sa maong mga hulagway ngadto sa social media.

Dugang niini nga human sa ilang imbestigasyon, mohimo ang ahensiya og konklusyon sa nahitabo diin posible nga mapasakahan og kaso kadtong mga tawo nga responsable niini, depende sa resulta sa ilang gihimo nga fact-finding-investigation.


Facebook Comments