iFM Laoag – Kalikagom ti City Governernment of Tuguegarao ti umay bumisita iti ili ti Piddig tapnu adalenda dagiti nagpipintas a programa iti lokal a gobierno nangnangruna ti pakaseknan iti Agro-forestry Development Project iti pagilian iti daytoy nga aldaw, Oktubre 21, 2019.
Iti surat nga impatulod ni Tuguegarao City Mayor Atty. Jefferson Soriano ken ni Piddig Mayor Engr. Eddie Guillen, kalikagom ti grupona a mapapintasda pay ti Forest Land Use iti nasao a siudad.
Malagip a ti lokal a gobierno ti Piddig iti panangidadaulo ni Mayor Eddie Guillen, napaneknekanen iti napintas a naggapuanan iti convergence project wenu panagtitipon dagiti naruay nga ahensya ti gobierno – a mangsaluad iti aglawlaw ken mangipaay iti napintas a programa – para kadagiti umili.
Ti Agroforestry ket dakkel a tulong iti aglawlaw babaen ti panangsaluad iti lawlaw babaen iti panagmula ti kaykayo a mangsalbar iti panagriggaay pay ti daga iti kabanbantayan ken mangipaay pay iti nadalus a danum a kasapolan iti kaadoan.
