Ginahulat na lang ang resulta sang COVID-19 positive patient dire sa syudad Koronadal matapos nga liwat ini nga ginpaidalom sa test sang Abril 26 agud mahibaluan kon bala negatibo na ini sa nasambit nga balatian.
Suno kay Hanah Ebeo, Health Education and Promotion Officer sang Integrated Provincial Health Office South Cotabato kon ano man ang mangin resulta sa test sang pasyenti magadepende ang masunod nga tikang sang local government unit sa pagtapna sang COVID -19 sa probinsya.
Ini matapos nga nagnegatibo na ang pasyenti sa banwa sang Banga sa ikaduha sini nga test kag natapos naman ang quarantine period sang mga tawo nga nakaupod sang nasambit nga pasyenti.
Sa subong suno kay Ebeo nagalab-ot sa 138 ang suspect cases kag sa 76 ka mga napaidalom sa test, 63 ang negatibo kag 10 na lang ang pending.
Samtang kon ang may-angot sa pagpapauli sa mga taga-South Cotabato nga yara sa iban nga lugar partikular na sa Davao City nga may local transmission sang COVID-19, suno kay Ebeo ang magabase ini sa Inter-Agency Task Force decision kag executive order ni Governor Reynaldo Tamayo Jr..
Ginpahayag niya man nga ikonsiderar sang IPHO ang convalescent plasma therapy kon i-identify sang DOH kag WHO nga epektibo para sa mga pasyenti nga may COVID-19.
