Dalan sa Maragusan apektado sa landslide tungod sa linog

Davao City – Padayon karon nga gipanubayan sa Local Government Unit (LGU) sa Maragusan, Davao de Oro ang damyos epekto sa magnitude 5.9 nga linog nga misentro sa New Bataan, Davao de Oro, alas 2:02 sa hapon kagahapong adlawa, Marso 7, 2023.

Sa datos sa Office of the Civil Defense (OCD)-XI, apektado sa landslide ang area sa Luzvimin-Katipunan ug Caragan sa Maragusan.

Sa interbyu sa DXDC RMN Davao kang Sergs Opeña, Municipal Information Officer sa LGU Maragusan, gilayong gisuta sa awtoridad ang apektadong mga imprastraktura.

“Not passable pa sa pagkakaron ang entrance sa may Luzvimin area sa Maragusan kay adunay landslide nga nahitabo human sa linog,” matud ni Opeña.

Samtang, sa gipagula nga advisory sa Department of Public Works and Highways (DPWH)-XI as of 6:40 sa gabii, Marso 7, 2023, dili passable ang Montevista-Compostela-Mati Road, diin giabisohan ang mga motorista nga gamiton una ang Compostela-Gabi-Magangit Road ug New Bataan-Panag-Camanlangan Road, sa kasamtangan.

RadyoMaN Kirby Manzon