DCPO: Nadakpan sa COMELEC gun ban misaka sa 5, 6 armas nasakmit

80
Davao City – Nisaka sa lima ka violators sa COMELEC gun ban ang nadakpan sa dakbayan sa Davao.

Sumala ni Davao City Police Office (DCPO) City Director Police Col. Kirby John Kraft sa interbyu sa RMN Davao, kasong paglapas sa RA 10591 in relation to COMELEC Resolution number 10728 ang giatubang sa lima ka mga dinakpan.

Pinakaunang violator sa gun ban nadakpan sa mga personahe sa PS12 Marilog nga giilang si Golvie Camad Bansilan, 33 anyos ug taga-Brgy Salumay, Marilog, Davao City.

Sa report giingong naka-inom kini ug gitiunan og baril ang mag-uuma nga si Jimmy Makalalas Lintad, 50 anyos ug dali kining giaksyunan sa mga pulis ang insidente ug nasakmit ang .38 nga revolver lakip na mga bala ug usa ka improvised shotgun.

Samtang, arestado ang usa ka pintor nga giidentipikang si Jaymar Castillo Tajora Alias “Dodong”, 30 anyos, taga Purok 25, Teachers Village, Brgy. Poblacion, Calinan ning syudad nga nasayrang adunay gitipigang sumpak kon improvised .38 nga revolver.

Sa gilusad nga Anti-Illegal Drugs Buy Bust Operation sa PS13 (MANDUG) Police Station nakuha sa mga operatiba sa posisyon sa suspek nga si Jovil Hinong Anieve Alias “Brad” ang .38 nga revolver niadtong Enero 17, 2022 sa Purok Gemini, Brgy Lasang, Davao City.



Atol sa police response nadakpan usab ang ika-upat nga violator sa gun ban nga giilang si Jhunnel Serad Salera, 28 anyos nga taga- Polomolok, South Cotabato ug nakuha sa suspek ang cal .22 nga revolver.

Samtang pinakaunang nadakpan sa COMELEC Checkpoint ang suspek nga si Jaf Robillo, 37 anyos nga taga-Acacia St., Matina, Davao City.


Sa report sa DCPO, alas-7 sa gabie niadtong Enero 20 sa checkpoint sa Marilog nakuha sa posisyon niini ang usa ka improvised rifle kun jolen gun.

RadyoMaN Aimee Guinita

<www.avast.com/sig-email?utm_medium=email&utm_source=link&utm_campaign=sig-email&utm_content=webmail>

Facebook Comments