Davao City – Gipahayag sa Davao City Police Office (DCPO) ang lig-on nilang suporta sa kampanya sa INTERPOL pinaagi sa Operation Pangea XVIII, usa ka internasyonal nga operasyon batok sa ilegal ug peke nga mga tambal. Tumong niini ang pagpanalipod sa publiko batok sa mga produkto nga mahimong makadaot sa panglawas ug kinabuhi sa mga konsumidor.
Sumala sa DCPO, gidasig ang katawhan nga magmatngon sa pagpalit og tambal, ilabi na sa online platforms ug sa mga dili awtorisadong tigbaligya. Gitambagan usab ang publiko nga susihon pag-ayo ang packaging, label, ug expiration date sa mga medisina aron malikayan ang pagpanglimbong ug posibleng peligro sa kahimsog.
Nagpahinumdom ang kapulisan nga ang pagpalit lamang gikan sa lisensyadong botika ug awtorisadong distributors maoy labing luwas nga paagi aron masiguro ang kalidad ug kaluwasan sa mga tambal. Giawhag usab ang mga residente sa Davao City nga dayong ireport sa mga otoridad ang bisan unsang kahina-hinalang produkto o tigbaligya isip kabahin sa padayong kampanya batok sa counterfeit medicines.
RadyoMaN Kareen Beltran
Facebook Comments
