Hinikayat ng Department of Health o DOH ang mga magulang, paaralan, at komunidad na makiisa sa nationwide deworming program ngayong Hulyo upang maprotektahan ang mga batang Pilipino laban sa bulate sa bituka.
Ayon sa DOH, ligtas at epektibo ang deworming gamit ang Albendazole, isang gamot na matagal nang ginagamit sa mga programang pangkalusugan at inirerekomenda ng World Health Organization.
Babala ng ahensya, ang hindi paggagamot ng impeksiyon ng bulate ay maaaring magdulot ng malnutrisyon, anemia, pagkaantala sa paglaki, at paghina ng pagkatuto ng mga bata.
Nilinaw rin ng DOH na maaaring makaranas ang ilang bata ng pansamantalang epekto tulad ng pananakit ng tiyan, pagsusuka, lagnat, pagtatae, o pantal sa balat, ngunit ito ay karaniwang nawawala at maaaring tugunan sa pamamagitan ng tamang gabay medikal.
Hiniling ng DOH sa publiko na kumuha lamang ng impormasyon mula sa mapagkakatiwalaang tanggapan at iwasang magpakalat ng maling balita na maaaring magdulot ng takot sa mga magulang at bata.
Patuloy naman ang ahensya sa pagsusulong ng ligtas at siyentipikong programa para sa kalusugan ng mga batang Pilipino. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
