Duha ka mga kanhi kapitan nga gikaingong suspek sa pagpatay sa duha ka mga lumad adtong 2021 sa lungsod sa Don carlos, nadakpan na

Malampusong nadakpan sa mga kapulisan ning probinsya sa Bukidnon ang duha ka mga kanhi kapitan sa lungsod sa Don Carlos nga ang kinsa gikaingong suspek sa pagpatay sa duha ka mga lumad adtong 2021 human nga gilusad ang operasyon adtong Martes, Enero 17, 2023 didto sa San Isidro, Talakag, Bukidnon.

Gipang-ila ang mga suspek nga silang Ex-Kapitan Rodel Singko Yungki Imota, ug Saturnino Costa, nga taga Barangay Mahayahay ug Buyot, Don Carlos, Bukidnon.

Sa interview sa RMN Malaybalay ngadto kang PCPT. Noel Oclarit, sa Criminal Investigation and Detection Group (CIDG)-Northern Mindanao, gibutyag niya nga gikonsiderang Top 4 Most Wanted Persons sa Bukidnon ang mga kanhi kapitang suspek sa kasong pagpatay sa duha ka mga lumad sa Don Carlos, Bukidnon.

Gipangunahan sa CIDG-Bukidnon inubanan sa Bukidnon Police Provincial Office, ug sa Talakag Municipal Police Station ang maong operasyon pag-issue sa warrant of arrest nga miresulta sa pagkasikop sa duha ka mga suspek.

Dugang pa ni PCPT. Oclarit nga sa milabayng tuig pa nila nga ginalakag ang duha ka mga suspek apan pakyas nga madakpan.

Sa karon, gikustodiya sa Talakag Municipal Police Station ang mga suspek ug target nga iturn-over sa issuing court alang sa tokmang disposasyon.

Gikasayran nga Agosto 2021, na-issue ang warrant of arrest batok sa duruha diin maoy suspek sa pagpatay sa duha ka mga lumad nga mulopyo sa Barangay Buyot, Don Carlos, Bukidnon.