Patay sa shootout sa Polomolok, South Cotabato ang ginaaligar carnapper kahapon nga adlaw, Agosto 20, 2020.
Ginkilala ang suspected carnapper nga si Mansur Marangit Cabalo,alyas Magalino, 15-anyos kag residente sang Barangay Rubber, Polomolok, South Cotabato.
Suno sa Polomolok Pnp nagapatrolya ang ila nga tropa sa national highway sa Purok 5, Barangay Palkan sang nakita nila si Cabalo sakay sa ginapatihan carnap nga motorsiklo nga ginamaneho ni Tadoy Macatiguel.
Apang sang pauntaton sang pulis wala namati ang mga suspek kundi ginpadasigan pa ang pagpadalagan sang motorsiklo samtang ginatiro sang angkas nga si Cabalo ang mga myembro sang SWAT team nga nagalagas sa ila.
Si Cabalo ang dead on arrival sa ospital tungod sa naangkon nga igo sang bala sang magbalos ang mga nagalagas nga pulis sa ila.
Samtang ang driver sang motorsiklo nga si Macatiguel ang tigayon naman nga nakapalagyo. Ang duha ka mga suspek ang mga myembro suno pa sang Dawlah-Islamiyah-Hassan Group ukon Nilong Sub-Group.
Ginmanduman suno pa ang mga ini nga imonitor ang mga aktibidad kag lokasyon sang patrol vehicles sang Polomolok PNP. Narekober naman sang mga pulis sa lugar ang 38 revolver nga armas luthang, duha ka mga bala kag cartridge case sang 45 pistol.
Narekober naman ang Honda RS 125 motorcycle nga ginapanag-iyahan ni Ivan Jay Nalugon nga nadula sa Prk. Makisama–A, Silway 8 Polomolok sang August 7.
