Mariing kinontra ni House Committee on Justice Chairperson at Lead Prosecutor Rep. Gerville Luistro ang isinusulong na online voting sa impeachment trial kay Vice President Sara Duterte.
Giit ni Luistro, napakahalaga ng proseso kaya dapat ay personal na nasasaksihan ng senator-judge ang trial at dapat personal din siyang boboto.
Tugon ito ni Luistro sa pagpapalutang ni Sen. Rodante Marcoleta ng posibilidad na payagan si Sen. Ronald “Bato” dela Rosa na lumahok at bomoto sa impeachment proceedings online o sa pamamagitan ng zoom.
Ayon kay Luistro, nirerespeto nya si Marcoleta at Dela Rosa pero kailangang ikonsidera ang kahalagahan ng impeachment process.
Diin ni Luistro, importanteng personal na nakikita ng senator-judge ang bawat testigo, gayundin ang bawat papel at video na inilalatag na sumusuporta sa Articles of Impeachment.
