Handang-handa na ang House prosecution panel para sa impeachment ni Vice President Sara Duterte.
Ito’y matapos na maghain na ito kanina ng manifestation sa sagot ni Duterte sa Articles of Impeachment.
Sa isang pulong balitaan, nilinaw nina House Prosecutor Gerville Luistro at Chel Diokno na hindi reply ang inihain nila dahil wala naman umanong isinagot ang bise presidente bagkus ay pinababasura lang nito ang articles of impeachment.
Ang naghain ng manifestation para sa House prosecution panel ay si House Secretary General Cheloy Garafil.
Tinanggap naman ito ni Senate Secretary at Clerk of the Impeachment Court Atty. Renato Batug Jr.
Nabigyan narin ng kopya ng manifestation ang Office of the Vice President at Fortun Narvasa and Salazar Law Office .
Sa naturang manifestation na pirmado ng 11 miyembro ng House prosecution panel, pinabulaanan umano ni Duterte ang lahat ng apat na articles of impeachment pero wala namang direktang impormasyon na ibinigay na kumokontra sa mga ito.
Sa kaniyang sagot, kinwestyon ni Duterte ang ilang procedures ng Kamara, pero sa manifestation, sinasabing inamin din ng bise presidente na bahagi na ito ng petisyoong nakabinbin sa Korte Suprema.
Umaasa ang House prosecution panel na makapaglalabas na ng official notice ang Senate Impeachment Court sa linggong ito matapos na ianunsyo ni acting Senate President Sherwin Gatchalian na susundin niya ang inilabas na timele ni Sen. Alan Peter Cayetano.
