Klase sa tanan nga mga pampubliko kag pribado nga eskwelahan sa probinsya sang Sultan Kudarat magaresume subong nga adlaw.

Magaresume na subong nga adlaw ang klase sa tanan nga mga pampubliko kag pribado nga eskwelahan sa probinsya sang Sultan Kudarat base naman sa ginpaggwa nga Executive Order No. 53 ni Gov. Suharto Mangudadatu. Ini ang nangin kumpirmasyon ni Department of Education 12 Information Officer Anton Maganto.
Nahibaluan nga nabalhag sa Section 21 sang EO nga ginmando sini ang pagbukas sang klase sa tanan nga pribado kag pampubliko nga eskwelahan sa elementarya kag sekondarya sa bug-os nga probinsya sang Sultan Kudarat.
Apang pipila sa kondisyon sang gobernador sa pagbukas sang klase ang pagbawal sa mga manunudlo nga mag-solicit sa mga ginikanan sang estudyante, himuon sang isa ka bes kada duha ka bulan ang pagpanghatag sang modules, pagplastar sang contingency plan sa tion nga may COVID-19 contamination sa manunudlo ukon estudyante.
Mag-angot sini, suno kay Maganto ginasiguro naman sang pamunuan sang Dep. Ed. 12 nga ipatuman ang nasambit nga mga kondisyones nga nabalhag sa EO sang local chief executive sang Sultan Kudarat.
Madumduman nga napaiway ang pagbukas sang klase sang Oktubre 5 sa probinsya sang Sultan Kudarat base naman sa ginpaggwa nga executive order sang gobernador tungod sa paandam sang COVID-19 nga isa ka manunudlo sa probinsya ang napatay sa balatian nga indi sini luyag nga masulit.

Facebook Comments