Lalaking misuway pagpayuhot og illegal nga drogang shabu, dakpan sa drug buy-bust operation

Nakapaslak na sa bilangguan ang usa ka lalaking misuway pagpayuhot sa illegal nga drogang shabu nga ang kinsa nadakpan sa gipahigayon nga drug buy-bust operation sa kapulisan pasado alas 7:56 sa gabie adtong Biyernes diha sa Purok-6, Barangay Casisang, Malaybalay City, Bukidnon.

Giila ang suspek nga si Joselito Basagan, 41 anyos, minyo, ug residente sa Purok-20, Phase 5, Barangay Casisang, Malaybalay City, Bukidnon.

Narekober ug nakuha sa posesyon sa suspetsado ang usa ka pakete sa gituohang drogang shabu nga mutimbang og 0.09 gramos ug mukantidad og P612.00.

Samtang laing duha pa ka mga pakete sa Shabu ang nakompiska sa mga otoridad nga gibana-banang mutimbang og 1.92 gramos ug mukantidad og P13,056.00.

Narekober usab ang P605.00 nga buy-bust money lakip ang usa ka unit sa Raider 150 FI nga single motor.

Gidala karon sa Malaybalay City Police Station ang dinakpang suspek lakip ang mga nakompiskang ebidensya nga layong iturn-over sa PNP Provincial Forensic Unit, Malaybalay City, Bukidnon alang sa eksiminasyon.

Kasong paglapas sa Sections 5 ug 11, Article II sa RA 9165 kon Comprehensive Dangerous Drugs Act of 2002 ang atubangon sa dinakpang suspetsado.