Franchise alang sa Taxi available na- LTFRB
Adunay 100 ka mga unit sa Taxi nga mag-operate dinhi sa dakbayan sa Butuan ang naaprobahan sa Land Transportation Franchising and Regulatory Board (LTFRB) Caraga.
Kini ang gikompirma ni Ma. Cristina Cassion, OIC Regional Director sa LTFRB Caraga sa interview sa RMN DXBC Butuan.
Sigun sa opisyal nga sa niaging buwan pa naaprobahan sa ilang buhatan ang 100 ka mga unit sa Taxi apan gilauman nga karong buwan sa Septembre ning tuiga ang hingpit nga katumanan niini.
Kinahanglan na’ng mabutangan ug Taxi ang dakbayan sa Butuan gumikan sa paspas nga kalamboan ning syudad ug magdagan ang operasyon niini palibot ning syudad.
Makig-alayon ang LTFRB sa local nga kagamhanan sa Butuan alang sa implementasyon sa operasyon sa Taxi aron malikayan nga makadugang sa problema sa trapiko ning syudad.
Gitumbok sa opisyal nga kinahanglan tun-an ang pamaagi ug sistema sa pag-dispatch sa matag unit ug adunay designated nga loading ug unloading area sa sentro sa syudad.
