MAG-UUMA NGA ADUNAY KASONG HOMICIDE ARESTADO
Nahulog sa mga kamot sa otoridad ang akusado sa kasong homicide nga adunay Criminal Case no. 2020-6-6023-B.
Giila ni PNP Caraga Regional Director PBGen. Romeo Caramat Jr. ang akusado nga si Albert Sajol Hipolan, alias Berto, 46 anyos, minyo, usa ka mag-uuma, residente sa Sitio Pong-o, Barangay San Fernando, Bislig City, Surigao del Sur.
Bitbit ang warrant of arrest nga giisyu sa Regional Trial Court, 11th Judicial Region, Branch 46 sa Bislig City si Hipolan ang naaresto sa kapulisan sa Sitio Marapot, Barangay Comagascas, Cabadbaran City, Agusan del Norte.
Siya ang gitudlong responsable nga midunggab patay sa iyang higala nga si Renante Endoma sa Purok 7, Sitio Pong-o, Barangay San Fernando, Bislig City. Nahitabo kini dihang nag-inom ang duha nga nahulog sa wala pagkasinabtanay niadtong Pebrero 25, 2020.
