Gipang-ila ang mga biktima nga silang Daniel Oracion Ocot, 60 anyos ug ang asawa niini nga si Adelaida Adolfo Ocot , 66 anyos, ug pulos residente sa Manalog, Hinonangan, Southern Leyte nga ang kinsa sakay sa usa ka Silver/White Aluminum Forward Wing Van nagtangag og plaka numero MBA 8494 nga narehistro ug gipanag-iyahan ni Jenus A. Ocot, residente sa Grand Terraces Sub., Casili, Consolacion, Cebu City.
Sumala sa report sa kapulisan nga nakadawat silag tawag gikan sa usa ka concerned citizen kabahin sa maong pagpamusil, hinungdan nga dali kining gi-operasyonan sa mga kapulisan.
Pag-abot sa lugar, patay na ang magtiayon nga anaa pa sulod sa ilang gisakyang wing van nga gikaingong mga mangomprahay og utan ug prutas.
Narekober gikan sa crime scene ang usa ka unit sa Samsung keypad nga cellphone nga target iturn-over sa Bukidnon Cyber Crime Unit alang sa eksiminasyon lakip ang duha ka mga basyo sa bala sa kalibre .45 nga pistola.
Ginasusi karon sa mga kapulisan ang mga CCTV Cameras sa mga dog-ol nga establishemento sa maong lugar nga posibleng maghatag og lead sa pag-ila sa mga suspek nga padayong ginapangita sa mga otoridad.
Napahiluna na sa punerarya ang patay’ng lawas sa mga biktima samtang ginapaabot ang mga kabanay niini.
