Patay ang isa ka persona, matapos nga bun-on sa Purok Masikap, Brgy Pagalungan, Polomolok, South Cotabato alas 5:00 sang hapon kahapon nga adlaw, Oktubre 22, 2020.
Ginkilala ang biktima kay Jun Tacyawan Taño , 57 –anyos kag farm worker, nga nakaangkon sang buno sa iya dughan nga nangin tunaan sang iya kamatayon.
Sa imbestigasyon bag-o pa man ang insidente ang biktima kag apo sini ang nagapreparar para sa birthday sang iya nga apo sa sulod sang Cordova farm sang ang suspek nga si Arman Dinang Bontang , 42-anyos, farm worker kag residente sang Cordova Farm, Purok Masikap, Brgy Pagalungan, Polomolok, South Cotabato ang nag-abot nga may dala nga makahulubog nga ilimnon kag pagkaon.
Apang sang malapit na ini sa biktima hinali na lang sini nga ginbuno ang biktima. Gilayon naman nga nagpalagyo ang suspek matapos nga makomitir ang krimen, apang nadakpan man sa hot pursuit operation sang kapulisan.
Gindala pa sa ospital ang biktima, apang gindeklarar ini nga dead on arrival sang attending physician.
Narekober naman sa posisyon sang suspek ang 2 ka heat sealed sachet sang ginasuspetsuhan shabu. Apang ang kutsilyo nga gingamit sang suspek ang wala nakit-an matapos nga ginhaboy sini sang nagpalagyo.
Kaso naman nga murder kag pagbayolar sa Sec. 11sang Art. II sang RA 9165 ang ipasaka batok sa suspek.
