Banga, Aklan – Patay rong sangka motorcycle rider matapos nga aksidente rayang sumunggab sa kasubeang nga tricycle kahapon sa Brgy. Manggan, Banga, Aklan.
Rong biktima nakilaea kay Rowen Remis, 37-anyos ag residente it Brgy. Mataphao, New Washington samtang rong driver it tricycle nakilaea kay Carl Abarecio alyas “Bobot”, sa legal nga edad ag residente it Brgy. Tabayon, Banga.
Sa report it Banga PNP nga natabo rong aksidente kahapon matapos nga rayang biktima sakay it motorsiklo ag nag-overtake sa ginasundan ugaling naaeang-aeangan sa kasubeang nga tricycle.
Tumama rong biktima sa prente it side car kung tricycle kung sa siin napusa gid rong windshield kara.
Insigida nga gindaea rong biktima sa hospital pero gindeklara raya nga dead on arrival bangud sa fatal nga lastro.
Mag-eowas kana, may mag-ina man nga pasahero it tricycle rong natamaan it nabasag nga windshield nga insigida man gitaw-an it nagakaigo nga pagbueong.
Samtang sa pihak nga parte, bangud nga raya hay ginakabig aksidente maga atubang rong magtimbang nga parte makarong adlaw sa Banga MPS para nga istoryahan ro nasambit nga problema.
