NTC-XI positibong mawagtang ang scammers tungod sa sim card registration

Davao City – Malaumon ang National Telecommunications Commission (NTC)-XI nga mawala na ang mga scammer gamit ang subscriber identity module (SIM) cards oras nga marehistro na ang tanang SIM.

Sa interbyu sa DXDC RMN Davao kang Nelson Cañete, Regional Director sa NTC-XI, gisulti niini nga posibleng nagaduhaduha na ang mga scammer nga mugamit og SIM apan kinahanglan gihapon nga mag-igmat ang publiko diin posible gihapong adunay mga mangilad samtang wala pa hingpit nga narehistro ang tanang SIM cards sa tibuok nasud.

“Kung nagkagamay man (ang scammers) i-expect nato nga mugamay pa gyud ni siya o mawala na ni siya pag mahuman na ang SIM card registration nato tungod kay ang tanan nga nagagana o tanan nga mga active SIM card kadto ra tong mga registered nga naa nay mga pangalan kung kinsay tag-iya ana nga mga SIM card,” sulti ni Cañete.

Gipanawagan sa NTC-XI official ang mga SIM card holder nga magparehistro na aron dili ma-deactivate ang ilang mga SIM card pag-abot sa deadline sa June 27, 2023, subay sa implementing rules and regulations (IRR) sa balaod.

RadyoMaN Kirby Manzon