P3M nga giingong illegal cooking oil trade, nabisto sa CIDG sa Davao City

Davao City – Nasakmit sa operasyong gipahigayon sa CIDG Davao City Field Unit, kauban ang Food and Drug Administration-Mindanao East Cluster Regulatory Enforcement Unit ug Sta. Ana Police Station, ang kapin P3 milyon nga kantidad sa walay rehistro nga palm ug coconut cooking oil sa usa ka pasilidad sa Monteverde cor. Bangoy Street, Davao City.

Atol sa operasyon, nadakpan ang usa ka 23-anyos nga lalaki nga giilang si alyas “Al”, samtang gialegar nga nagbaligya og mga cooking oil nga walay rehistro sa FDA ug walay License to Operate ang maong pasilidad.

Lakip sa gikumpiska sa mga otoridad ang upat ka tangke nga adunay dul-an sa 9.5 ka toneladang palm ug coconut oil, lima ka mga sudlanan nga adunay 5,000 ka litro sa coconut oil, mga timbangan, bakanteng tangke, ug mga container. Ang tanang nakumpiska adunay kinatibuk-ang kantidad nga gibanabana sa P3,148,200.

Matud sa CIDG, paglapas kini sa Section 10(k) sa Republic Act No. 9711 o Food and Drug Administration Act of 2009. Nagpasidan-an usab ang ahensya sa publiko nga likayan ang pagpalit og mga pagkaon nga walay FDA registration ug dasigon ang pagreport sa mga kahina-hinalang bodega ug ilegal nga kalihokan sa ilang komunidad.

RadyoMaN Kareen Beltran