Pagpatuman sa Election Gun Ban checkpoints sa kapulisan sa Malaybalay, wala pay nakasupak

Gikabutyag karon sa Malaybalay City Police Station nga hangtud karon wala pay nakompiskahan nga illegal nga nagdala-dala og armas sa dakbayan sa ilang mga gipahigayong checkpoints sukad pagsugod sa Election Gun Ban adtong Enero 9.

Sa interview sa RMN DXMB Malaybalay kang PEMS Alexander Calma, gibutyag niini nga nagpadayon sila sa pagpahigayon og COMELEC Checkpoint sa dakbayan aron nga masiguro ang kaluwasan sa tanan ilabi na sa pagpatuman sa Election Gun Ban.

Dugang ni Calma nga hugot gayud nilang gipatuman kini ilabi na nga padangat ang Election Campaign Period ug aron nga masiguro ang seguridad sa usag-usa.

Sa pikas nga bahin, gisulti ni Calma nga subay usab sa bag-ong executive order nga gipagawas sa dakbayan sa Malaybalay, hugot na nga gipatuman ang curfew hours, liquor ban ug ang rekisito sa Vaccination Cards pasulod sa mga establisyemento.

Sa pagkakaron, wala usay mga nadakpan sa paglapas sa gipahigayong Curfew Hours gikan alas 10 sa gabie hangtud sa alas 4 sa kadlawon sa dakbayan.

Ang Executive Order no. 172 series of 2022 gipagawas sa dakbayan sa Malaybalay pinitsahan Enero 12, 2022 ug pinirmahan ni Mayor Florencio Flores Jr.