PATAY GID | 40-ANYOS NGA MISTER, NALUTHANGAN-PATAY SA BANWA SANG JAMINDAN; SUSPEK, MEMBRO SANG PHILIPPINE ARMY!

38
Jamindan, Capiz – Patay ang 40-anyos nga mister matapos nga aksidente nga naluthangan sang iya mismo pakaisa nga katapo sang Philippine Army mga alas 4:50 sang hapon sa Barangay Aglibacao, banwa sang Jamindan.
Ginkilala ang biktima kay Arnulfo Vacaro y Mendoza, 40-anyos residente sang Barangay Pangabat, Jamindan, Capiz samtang ang suspek ang ginkilala kay Sgt. Joemariel Vacaro y Verde, 35-anyos Philippine Army member, assigned sa 12IB nga nabase sa Calinog, Iloilo.
Suno sa imbestigasyon sang Jamindan PNP, magkaupod ang duha nga nagainom sa likod nga porsyon sang poluy-an sang suspek upod si Jesreel Vacaro y Mendoza.
Hinali lamang nga nakabati sang lupok sang pusil si Jesreel samtang ini ang nagapangihi, mga lima ka (5) metros ang distansya halin sa duha.
Sang nagbalik ini, nakit-an na lamang sini ang duguon nga si Arnulfo Vacaro nga ginaalay-ay sang suspek.
Sa dugang nga imbestigasyon ni PSSgt Lou Jacinto Robles, ginahampangan sang duha ka persona ang .357 caliber revolver nga ginapanag-iyahan sang AFP member apang aksidente nga napitik sang suspek ang gatilyo kabangdanan nga naigo sa dughan lapos sa likod ang biktima.
Una ini nga gindala sa Jamindan Rural Health Unit antes nga gin-refer sa Roxas Memorial Provincial Hospital(RMPH) para sa dugang nga pagbulong apang ini ang gindeklarar nga ginbawian sang kabuhi samtang ginatatap sang doktor.
Boluntaryo naman nga nagsungka sa Jamindan PNP ang suspek samtang wala marekober ang pusil nga gingamit sa krimen.
Facebook Comments