Patay’ng lawas nga nakaplagan sa dakbayan sa Malaybalay, padayong ginapailawom sa makuting imbestigasyon

Padayon karon ang makuting imbestigasyon nga ginapahigayon sa mga kapulisan sa siyudad sa Malaybalay kabahin sa patayng lawas nga nakaplagan sa usa sa mga barangay sa siyudad.

Sumala ni PLtCol. Julius Clark Macariola, hepe sa kapulisan sa Malaybalay, gibutyag niya nga gina-imbestigahan pa sa kapulisan ang maong insidente kung asa nakaplagan ang patayng lawas particular didto sa Purok-1, Barangay Sinanglanan, Malaybalay City.

Giila ang biktima nga si Albert Gabo Salatan, 28 anyos, ulitawo, mag-uuma ug residente sa naasoy nga lugar.

Nagbuy-od tunga sa irrigasyon sa maong lugar nga wala nay kinabuhi ang maong lalaki sa dihang makaplagan sa kapulisan nga gituohang nalumos.

Sumala sa amahan sa biktima nga si Elmer Salatan, ulahing nakita ang biktiam adtong Miyerkules sa gabie sa nakalabayng semana, Dungan sa kusog nga baha nga mihapak sa mga kabarangayan sa siyudad.

Wala usay nakita nga sinyales sa kamatayon sa biktima nga gipahiluna na karon sa punerarya.