Opisyal nang isinailalim sa State of Calamity ang buong lalawigan ng Pangasinan sa bisa ng Provincial Resolution No. 985-2026 nitong Agosto 31, 2026.
Isa sa mahigpit na mino-monitor ngayon ng Municipal Disaster Risk Reduction and Management Office o MDRRMO ng Sta. Barbara ang Sinocalan River, matapos umabot sa 7.80 meters above sea level o MASL ang water level nito, alas-7:00 ng umaga noong Agosto 31.
Ayon sa MDRRMO Sta. Barbara, nasa above critical level na ang lebel ng tubig at ito na rin ang pinakamataas na water level na naitala sa Sinocalan River ngayong taon.
Dahil dito, pinaalalahanan ang mga residenteng nakatira malapit sa ilog na manatiling alerto at patuloy na bantayan ang lebel ng tubig, lalo na sa posibilidad ng mabilis na pagtaas nito.
Sa panayam ng IFM News Dagupan kay Raymondo T. Santos, Head ng MDRRMO Sta. Barbara, sinabi nitong umabot na sa 6,255 pamilya ang apektado ng pagbaha.
Sa naturang bilang, 40 pamilya o 134 indibidwal ang kasalukuyang nananatili sa evacuation centers.
Samantala, 16 na barangay na ang nakaranas ng pagbaha o pagtaas ng lebel ng tubig-baha.
Dahil sa patuloy na pagtaas ng tubig, nakararanas ng pangamba ang ilang residenteng nakatira malapit sa Sinocalan River, lalo na sa mga lugar na lampas-tao na ang lalim ng baha.
Ayon pa kay Santos, kabilang sa pangunahing pangangailangan ngayon ng mga evacuee ang malinis na tubig.
Tiniyak naman ng MDRRMO Sta. Barbara ang kahandaan nitong rumesponde sakaling kailanganin ng mga residente ang agarang tulong o paglikas.
Hinikayat ni Santos ang mga residenteng nangangailangan ng assistance na huwag mag-atubiling makipag-ugnayan sa kanilang tanggapan upang agad silang masundo at mailipat sa pinakamalapit na evacuation center. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
