Sa interview sa RMN Malaybalay ngadto kang PMaj. Dino Cuevas, Hepe sa Kadingilan Municipal Police Station, gibutyag niya nga pasado alas 12 sa udto kagahapon nadeklarar nga malinawon ang area ug hingpit nga naabog ang armadong grupo nga dili muminus sa 60 ka mga indibidwal nga nangharass sa mga kapulisan.
Mga alas 9 sa buntag sumala pa ni Maj. Cuevas nga naundang ang panagbinayloay og bala tali sa duha ka grupo.
Basi sa mga residente sa maong area, gikaingong mga lost command sa Moro Islamic Liberation Front (MILF) ang maong armadong grupo nga gipanguluhan sa usa ka Commander Puti.
Apektado sa maong engkwentro ang Sitio Kawilihan, Bacbacon, ug Bukohanon sa Barangay Cabadiangan diin namakwit ang mga residente gumikan sa hulga sa seguridad.
Sa karon, padayon pa nga ginamonitor sa kapulisan ang encounter site ilabi na pagsiguro sa seguridad sa katawhan apan gidid-an pa nga makabalik sa ilang pinuy-anan ang muabot sa 389 ka mga pamilya.
