Basilan—Sikop ang usa ka Ustadz nga may kalabutan sa pagpabusikad sa usa ka van sa Sitio Magwakit, Barangay Bulanting, Lamitan City, Basilan, atol sa gihimong operasyon sa 7th Scout Ranger Company, kagahapong adlawa.
Giila ni Colonel Montano Almodobar, commander sa Scout Ranger Battalion Company ang suspek nga si Ustadz Jainul Indalim alyas Abdulgani, 58, nga taga Barangay Maganda, Lamitan City.
Subay sa report usa ka Granada ang nakumpiska sa awtoridad sa posisyon sa Ustadz kansa may dakong partisipasyon matud pa sa pagbusikad sa van niadtong Martes sa kaadlawon nga gikamatay sa 11 ka mga tawo ug pagkaangol sa laing 10 ka biktima.
Samtang migula usab ang mga report nga matud pa si Indalim ang misugat sa mga langyaw nga miabot sa Lamitan City.
Sa kasamtangan balhog na sa silda sa kapulisan ang Ustadz ug gikatakda kining pasakaan ug kasong multiple murder, multiple physical injury, ug kalapasan sa Republic Act 9516 (Illegal Possession Of Explossive).
(Photo Credit to Rmn Zamboanga)
