Publiko, gi-aghat sa DTI-Bukidnon nga pahimuslan ang umaabot nga Diskwento Caravan

30
Gi-aghat sa Department of Trade and Industry (DTI)- Bukidnon Provincial Office ang publiko nga pahimuslan ang duha ka adkaw nga Diskwento Caravan “Balik-Eskwela” Edition sa siyudad sa Valencia karong umaabot August 18-19, 2022.

Sa interview sa RMN Malaybalay ngadto kang Junar Merla, ang OIC-Chief sa Consumer Protection Division sa DTI-Bukidnon gibutyag niini nga ang mao nga Diskwento Caravan dungan nga himoon sa nagkadaiyang lugar sa tibook nasud aron makahatag og mas barato ug dekalidad nga produkto sa mga mamalitay.

Tumong sa mao nga aktibidad nga makatabang sa mga mamalitay’ng publiko ilabina sa mga marginalized ug low-income sector o konsomante ilabina karong nagmahal ang presyo sa mga nag-unang palaliton.

Apil sa mga mapalit sa mao nga diskwento caravan ang mga school supplies ilabina nga ang tumong niini nga makabarato ang mga konsumante sa gasto sa pagpalit sa mga gamit para sa umaabot nga pagbukas sa klase.

Ipahigayon ang mao nga caravan sa LGU-Valencia Covered Court karong August 18-19, 2022 gikan sa 9:00 a.m. hangtod 5:00 p.m.

Matud ni Merla nga nag-imbitar sila og mga wholesaler ug manufacturer para sa mao nga aktibidad.



Dugang niya nga kada bulan na nila kining buhaton o hangtod karong Nobyembre aron makapahimulos usab ang ubang mga mamalitay nga nagpuyo sa ubang lugar sa probinsya sa Bukidnon.

Facebook Comments