RMN Laoag – Inarak ti naruay a tattao sipud idi kalman ti Ilocos Norte manipud iti nagduduma a probinsya para ti Region 1 Atheletic Association (R1AA) Meet.
Arigna fiesta iti kalsada gabuay ti adu a bisbisita pakairamanan kadagiti estudyante, mangisursuro ken coach manipud iti probinsya ti La Union, Pangasinan, Ilocos Sur ken Norte nga umabot ti nasurok sangapulo a ribo a tattao.
Nakasagana met dagiti traffic aides, karaman kadagiti taga highway patrol group a nakapwesto iti dalan tapnu masigurado ti kinatalged dagiti motorista ken tattao a dumaldalyasat.
Idawdawat met ti kapulisan a nu mabalbalin, saanen nga agitugot ti lugan, nu di ketdi agcommute laengen tapno maliklikan ti aberya iti kalsada, nangnangruna ta dumagsen ti trapiko nu adda ti okasion ti probinsya.
Kabayatanna, saan a sigurado a makaatendar ni Senador Manny Pacquiao nga imun-una nga inimbitaran ti probinsya para ti nasao nga ayayam.
Simmangpet met ni Presidente Rodrigo Duterte iti Laoag International Airport ken nagturong a dagus daytoy iti probinsya ti Abra tapno agatendar ti fiestada ken irapinna pay ti agkampanya ti partidona.
Awan pay ti kompirmasyun nu agatendar met ni Duterte iti R1AA.
Bernard Ver, RMN News
