Aminado si Manila 6th District Representative Benny Abante na inantok siya sa impeachment trial ni Vice President Sara Duterte dahil sa tanong ng mga abogado mula sa panig ng depensa.
Sinabi ito ni Abante makaraang mapansin ni Impeachment Court Presiding Officer Francis Escudero na naidlip na siya habang nakasalang na testigo sa paglilitis si Philippine Government Electronic Procurement System (PhilGEPS) Division Chief Rendell Sopeña.
Sabi ni Abante, masarap makinig sa trial pero nakakaantok kapag malamya na ang tanong ng mga defense lawyers.
Pinuna ni Abante na palagi na lang nag-o-object sa prosecution ang mga defense lawyers na tila ba nilalansi tayo at layuning ilihis ang tunay na isyu laban sa bise presidente.
Napangiti naman si Abante sa naging rason ni House Lead Prosecutor at Batangas Rep. Gerville Luistro na kaya nakapikit si Abante habang nagpapatuloy ang impeachment trial kanina ay dahil ipinagdarasal nito ang prosekusyon.
