Sumala ni DCPO Spokesperson Police Major Catherine dela Rey nga walay natalang dagkong mga panghitabo nga krimen sa dakbayan atol sa kasagsagan sa kuwaresma.
Gani giingon pa ni dela Rey nga bisan sa mga kasimbahanan nga dunay gipahigayong aktibidad sa siyete palabras niadtong Biyernes Santos ug Easter Sunday kagahapon adlawa walay natalang dunay nabiktima sa kuot, kawat, ug uban pang petty crimes.
Gipasabot sa tigpamaba sa kapulisan sa dakbayan ang hapsay ug kalinaw sa semana santa bunga kini sa mas gipahugtang seguridad sa Davao City Police Office.
Segun pa sa opisyal, mukabat sa 800 ka personahe gikan sa DCPO ang gipakatag sa 45 ka simbahan sa syudad ug wala pa’y labot niini ang augmentation force gikan sa Police Regional Office XI ug maingon man ang force multipliers kinsa mitabang sa pagbantay sa kaluwasan sa mga Dabawenyo nga midagsa sa mga kasimbahanan.
Dugang pa sa DCPO Spokesperson nga gawas sa deployment sa mga kasimbahanan, aduna sa’y mga mobile patrollers ang nagpatrolya sa mga residential areas partikular sa mga subdivisions ug rason nganong wala makalihok ang mga kriminal sa nakalabay’ng Semana Santa.
Samtang pikas bahin, gikatakda magpagawas sab ang PRO XI og kinatibuk-ang assessment mahitungod sa nahimong estado sa rehiyon onse sa nakalabay’ng paghinumdom sa lenten season.
RadyoMaN Joel Viray
