𝗣𝟭.𝟵-𝗠 𝗦𝗛𝗔𝗕𝗨 𝗔𝗧 𝗠𝗚𝗔 𝗕𝗔𝗥𝗜𝗟, 𝗡𝗔𝗦𝗔𝗠𝗦𝗔𝗠 𝗦𝗔 𝗢𝗣𝗘𝗥𝗔𝗦𝗬𝗢𝗡 𝗦𝗔 𝗥𝗢𝗫𝗔𝗦, 𝗜𝗦𝗔𝗕𝗘𝗟𝗔

Cauayan City – Tinatayang nasa P1.9 milyong halaga ng hinihinalang shabu at ilang matataas na kalibre ng baril ang nasamsam ng mga awtoridad sa isinagawang search warrant operation laban sa dalawang hinihinalang High Value Individual (HVI) sa Brgy. Lanting, Roxas, Isabela noong Mayo 17.
‎
‎Kinilala ng pulisya ang mga naarestong suspek na sina alyas “Orang,” 51-anyos, at alyas “Porman,” 35-anyos, na kapwa residente ng naturang barangay.
‎
‎Sa isinagawang operasyon, nakumpiska mula sa mga suspek ang mahigit 279 grams ng hinihinalang shabu, drug paraphernalia, digital weighing scale, at iba’t ibang kagamitan na pinaniniwalaang ginagamit sa pagbebenta ng ilegal na droga.
‎
‎Maliban dito, narekober din ang isang revolver, Glock 17 9mm pistol, Colt MK IV caliber .45 pistol, mga magazine, at samu’t saring bala at live cartridges.
‎
‎Matapos ang operasyon, dinala ang mga suspek sa Roxas Municipal Police Station para sa kaukulang dokumentasyon at pagsasampa ng kaso kaugnay sa paglabag sa Republic Act 9165 o “Comprehensive Dangerous Drugs Act of 2002” at Republic Act 10591 o ang “Comprehensive Firearms and Ammunition Regulation Act”.