Cauayan City – Arestado ang dalawang lalaki matapos mahulihan ng mga undocumented forest products sa isinagawang checkpoint ng pulisya sa Barangay Poblacion, Diadi, Nueva Vizcaya.
Nahaharap ang mga ito sa kasong paglabag sa Presidential Decree No. 705 o ang Revised Forestry Code of the Philippines.
Kinilala ang mga suspek na sina alyas “Rey,” 40-anyos, at alyas “Cesar,” 41-anyos, kapwa residente ng Isabela at parehong magsasaka.
Sa ulat ng Diadi Municipal Police Station, pinahinto nila ang isang trak para sa regular na inspeksyon nang mapansin ang kargang mga kahoy na hinihinalang bahagi ng disassembled o knock-down furniture.
Hindi nakapagpakita ang dalawa ng kaukulang permit at transport documents para sa kanilang kargamento, dahilan upang sila ay arestuhin.
Aabot sa 700 board feet ang nakumpiskang kahoy na tinatayang nagkakahalaga ng ₱31,500.
Nakipag-ugnayan din ang pulisya sa MENRO Diadi para sa wastong beripikasyon at dokumentasyon ng mga ebidensya.
Agad namang dinala sa himpilan ng pulisya ang mga suspek, kasama ang sasakyan at mga nakumpiskang materyales, para sa kaukulang dokumentasyon at pagsasampa ng kaso.
Samantala, muling pinaalalahanan ng mga awtoridad ang publiko na mahigpit na ipinagbabawal ang pagdadala ng forest products nang walang sapat na dokumento bilang bahagi ng kampanya laban sa illegal logging.
Source: NUEVA VIZCAYA PPO
————————————–
Para sa update at iba pang mga balita, bisitahin ang aming facebook page 98.5 iFM Cauayan at ang aming website, www.rmn.ph/985ifmcauayan.
#985ifmcauayan
#idol
#numberone
#ifmnewscauayan
